એકલો જાને રે

એકલો જાને રે 
 
તારી જો હાક સુણી કોઇ ના આવે, તો એકલો જાને રે
એકલો જાને, એકલો જાને, એકલો જાને રે
તારી જો હાક સુણી કોઇ ના આવે, તો એકલો જાને રે

જો સૌનાં મોં સિવાય
ઓરે ઓરે ઓ અભાગી ! સૌનાં મોં સિવાય
જયારે સૌએ બેસે મોં ફેરવી, સૌએ ડરી જાય
ત્યારે હૈયું ખોલી, અરે તું મન મૂકી
તારાં મનનું ગાણું એકલો ગાને રે
તારી જો હાક સુણી કોઇ ના આવે, તો એકલો જાને રે

જો સૌએ પાછાં જાય
ઓરે ઓરે ઓ અભાગી ! સૌએ પાછાં જાય
ત્યારે કાંટા રાને તારે લોહી નીંગળતે ચરણે
ભાઇ એકલો ધા ને રે
તારી જો હાક સુણી કોઇ ના આવે, તો એકલો જાને રે

જયારે દીવો ન ધરે કોઇ
ઓરે ઓરે ઓ અભાગી ! દીવો ન ધરે કોઇ
જયારે ઘનઘેરી તુફાની રાતે, બાર વાસે તને જોઇ
ત્યારે આભની વીજે, તું સળગી જઇને
સૌનો દીવો એકલો થાને રે
તારી જો હાક સુણી કોઇ ના આવે, તો એકલો જાને રે

મૂળ કૃતિ રવીન્દ્રનાથ ટાગોરની

ગુજરાતીકરણ : મહાદેવભાઇ દેસાઈ